قال بوليس قال..هأو

بوليس؟..انت بوليس؟
وعشان كدة جاي لابس ميري، وعايز تفاوض؟..

بيقول لك يا جدع..أولمرت عايز يفاوض..أو لأ..هو مش عايز، بس عشان خاطر بوش هيعملها..
انما يهود أمريكا مسكتوش..طلعوا مظاهرات، وصوتوا وولولوا، باعتبار أولمرت كدة بيتنازل، ويكافئ الارهابيين..

يكافئنا بإيه؟..بطلعته البهية طبعا، ازاي واحد يهودي (الا أولمرت سفارديمي ولا أشكنازي؟) مرة واحدة يقعد معانا؟..فكركوا هتاخدوا منه أكتر من كدة؟!..آدي قعدة..وهاتوا العشا..هاتوا أي حاجة..هو أولمرت خسران إيه؟
لا هو المحاصر..ولا ولاده بيتقتلوا، ولا الأدوية ممنوعة عنه (انتوا عارفين انه صاحب عيا، طبعا ده لا يعني انه ممكن يحس بالعيانين)

طب نروح بعيد ليه؟
إذا اللي قاعد قدامه فضل متمسك بالخيارة الاستراتيجية، الخيارة الاستراتيجية، كل ما كان يسمع سيرة المحروس أولمرت، لكن ساعة ما يسمع غزة..يبلع حباية من اياهم ويقول انا جدع..

عموما عموما مش وقته، خلي الكلام ده كله لبعدين..دلوقتي بقى دولنا الأشاوز (من شوز يعني) راحوا كلهم، طبعا لازم يشيلوا الليلة، مانتوا عارفين ضريبة الخيار الاستراتيجي..بالدور يا حضرات، كل واحد خيارة..خياراراراراية واحدة بس على رأي المرحوم عادل..

طبعا يا جماعة أي قعدة هناك لا تتوقعوا انه الكلام فيها هيخرج عن الهطل المعتاد..نفس البوقين اللي بنسمعهم كل مرة..لكن حقيقي..وفي الظروف دي..الوضع أصبح نوع من قلة الأدب..